وزیر قانون پنجاب رانا ثناءاللہ نے کہاہے کہ محرم کے دوران وزیر داخلہرحمان ملک اور وزیر قانون بابر اعوان کے پنجاب میں داخلے پر پابندی عائد کی جاسکتی ہے جبکہ گورنرسلمان تاثیر کونظر بندکیاجاسکتاہے۔ دنیا نیوز سے گفتگو کرتے ہوئے ان کا کہنا تھا کہ پنجاب حکومت کے پاس ثبوت ہیں کہ وہ صوبے میں فرقہ واریت پھیلانے کی کوششوں میں ملوث ہیں۔ ان کا کہنا تھا کہ دونوں فرقہ وارانہ فسادات کروانے کی منصوبہ بندی کر رہے ہیں، مثلاً جب کوئی بھی پنجاب میں دہشتگردی کا واقعہ ہو تو یہ کسی کے پاس تعزیت کےلئے جائیں تو وہاں پر کھلے عام میڈیا کے سامنے کہتے ہیں کہ یہ دہشتگردی حکومت پنجاب نے کروائی ہے اور حکومت پنجاب ناکام ہے۔ ان کا کہنا تھا کہ گورنر پنجاب کو اس سلسلے میں وزیر داخلہ رحمان ملک اور بابر اعوان کی تائید حاصل ہے۔ ان کا کہنا تھا کہ سانحہ داتا دربار اور سانحہ کربلا گامے شاہ کے بعد ان کے بیانات اس بات کی گواہی دیتے ہیں کہ یہ تینوں افراد پنجاب میں فرقہ وارانہ فسادات کروانے کی کوششوں میں ملوث ہیں، اور اگر ان کی یہ کوششیں جاری رہیں تو میں حکومت پنجاب کو تجویز دوں گا کہ محرم میں بابر اعوان اور رحمان ملک کے پنجاب میں داخلے پر پابندی لگائی جائے اور گورنر پنجاب سلمان تاثیر کو گورنر ہاﺅس میں نظر بند کر دیا جائے۔ اس سلسلے میں سینئر صوبائی وزیر راجا ریاض نے دنیا نیوز سے خصوصی گفتگو کرتے ہوئے کہا کہ صوبائی وزیر قانون رانا ثناءاللہ کا بیان انتہائی غیر ذمہ دارانہ ہے۔ راجا ریاض کا کہنا تھا کہ اس بیان کی مذمت کرتے ہیں اور وزیر اعلیٰ پنجاب سے نوٹس کی درخواست کرتے ہیں، یہ بیان جمہوریت اور حکومت کےلئے نقصان دہ ہے اور صوبہ اور وفاق کے درمیان مفاہمت کی سیاست پر اثر انداز ہو گا۔ ان کا کہنا تھا وزیر اعظم نے ملاقات کے دوران کہا ہے کہ پنجاب میں اتحادی حکومت کو قائم رکھنا ہے، مسلم لیگ (ن) وفاق میں جو بھی کردار ادا کرے ہم نے پنجاب میں مثبت اور جمہوری انداز حکومت رکھنا ہے۔ راجا ریاض نے کہا کہ اس سے اندازہ ہوتا ہے کہ ہم جمہوریت کے کتنے بڑی حامی ہیں اور ہماری جمہوریت کےلئے کیا خدمات ہیں کہ ان الزامات کے باوجود ہم پنجاب میں جمہوریت کو قائم رکھے ہوئے ہیں۔