وزیر داخلہ رحمٰن ملک نے کہا ہے کہ وہ رانا ثناء اللہ کے بیان پر کوئی رد عمل نہیں دینا چاہتے۔ ہو سکتا ہے انہوں نے یہ بیان نہ دیا ہو اور کوئی غلط فہمی ہوگئی ہوِ۔ انکا کہنا ہے کہ حکومت سے باہر بیٹھے لوگ حکومت کے خلاف سازش نہ کریں۔ پارلیمنٹ ہاوس کے باہر میڈیا سے گفتگو کرتے ہوئے رحمٰن ملک نے کہا کہ ملک میں جمہوریت بہت اچھے طریقے سے چل رہی ہے، ماضی میں کرپشن کے نام پر کتنی حکومتیں گئیں لیکن ثابت کچھ نہیں ہوسکا۔ انھوں نے کہا کہ طالبان خواہ بلوچستان میں ہوں یا خیبر پختون خواہ میں انکے خلاف ایکشن ہوگا۔ انھوں نے کہا کہ لشکر جھنگوی ایک دہشت گرد تنظیم ہے اور ہر دہشتگرد واقعہ کے بعد اس تنظیم کے لوگ واقعہ کی ذمہ داری قبول کرتے ہیں۔ انھوں نے کہا کہ ملک کو غیر مستحکم کرنے کی کوشش کی جارہی ہے۔ حکومت سے باہر بیٹھے لوگ حکومت کے خلاف سازش نہ کریں۔ رحمٰن ملک کا کہنا تھا کہ اگر انھیں موقع ملا تو اس حوالے سے بہت سے حقائق پر سے پردہ اٹھائیں گے۔ باتیں کھولوں گا ایک سوال پر وفاقی وزیر نے کہا کہ کراچی کو غیر مستحکم کرنے کی کوشش کی جارہی ہے۔ کراچی میں رینجرز کے اختیارات میں اضافہ نہیں کیا گیا۔ وفاقی وزیر کا کہنا تھا کہ روز یہ خبریں آتی ہیں کہ حکومت نہیں رہے گی۔ ایسا تاثر نہ دیا جائے جس سے لگے فوج علیحدہ ہے اور حکومت اور علیحدہ ہے۔