حکام کے مطابق یہ کانفرنس جمعرات کی دوپہر کو سیکورٹی کے خدشات کے پیش نظر ’ریڈ زون‘ میں واقع وزیراعظم ہاؤس میں ہوگی۔

یہ کانفرنس بند کمرے میں ہوگی اور صحافیوں کو کوریج کی اجازت نہیں ہے۔ حکام کے مطابق انٹیلیجنس حکام اور وزیرِ خارجہ حنا ربانی کھر شرکاء کو بریفنگ دیں گے۔

جمعرات کو کل جماعتی کانفرس سے پہلے بدھ کی رات کو صدر آصف علی زرداری، وزیراعظم سید یوسف رضا گیلانی اور بری فوج کے سربراہ جنرل اشفاق پرویز کیانی کے درمیان ایوان صدر میں ملاقات ہوئی ہے۔

ایون صدر کے ترجمان فرحت اللہ بابر کی جانب سے جاری ہونے والے ایک بیان کے مطابق دو گھنٹے تک جاری ہونے والی ملاقات میں اس وقت ملک کو درپیش مسائل پر بات چیت کی گئی۔

اسلام آباد میں بی بی سی کے نامہ نگار اعجاز مہر کے مطابق کل جماعتی کانفرنس میں شرکت کے لیے تیس سے زیادہ سیاسی اور مذہبی جماعتوں اور گروہوں کے پچن سے زیادہ سرکردہ رہنماؤں نے حامی بھر لی ہے تاہم بلوچستان نیشنل پارٹی کے سربراہ اختر مینگل نے اجلاس کے بائیکاٹ کا اعلان کیا ہے۔

بلوچستان نیشنل پارٹی کے سربراہ سردار اختر مینگل نے اس کانفرنس میں شرکت سے انکار کرتے ہوئے کہا ہے کہ بلوچستان میں ٹارگٹ کلنگ اور مسخ شدہ لاشیں ملنے کا سلسلہ جاری ہے اور اس صورت میں وہ کسی حکومت اجلاس میں شرکت نہیں کریں گے۔ جبکہ بلوچستان سے ہی ایک اور قوم پرست جماعت نیشنل پارٹی کے سربراہ ڈاکٹر عبدالمالک بلوچ نے بھی اس کانفرنس کا بائیکاٹ کیا ہے اور کہا ہے کہ موجودہ حکومت بلوچستان کے مسائل حل کرنے اور بالخصوص سیاسی کارکنوں کے اغوا اور قتل کے واقعات کو روکنے میں ناکام رہی ہے۔

جس میں مسلم لیگ (ن) کے سربراہ میاں نواز شریف، جماعت اسلامی کے امیر منور حسن اور تحریک انصاف کے عمران خان بھی شامل ہیں۔

مسلم لیگ (ن) کے سربراہ میاں نواز شریف نے صحافیوں سے بات کرتے ہوئے کہا کہ انہیں کچھ تحفظات ہیں جو وہ کانفرنس سے پہلے بتانا مناسب نہیں سمجھتے۔

کانفرنس میں بلوچستان اور سندھ کی بعض قوم پرست جماعتوں کو مدعو نہیں کیا گیا جس پر طلال بگٹی نے وزیراعظم پر کافی تنقید کی ہے۔

پاکستان کے قبائلی علاقوں میں مبینہ طور پر موجود حقانی نیٹ ورک کے خلاف کارروائی کے معاملے پر امریکہ اور پاکستان میں اختلافات کے بعد حکومت نے قومی اتفاق رائے کے لیے یہ کانفرنس بلائی ہے۔

کانفرنس کے ایجنڈے کو حتمی شکل دینے کے لیے وزیراعظم نے اپنی جماعت پیپلز پارٹی کے سرکردہ رہنماؤں سے مشاورت مکمل کرلی ہے۔

حکومت کی کوشش ہوگی کہ متفقہ قرارداد منظور کرکے امریکہ کو یہ پیغام دیا جائے کہ وہ پاکستان میں گُھس کر کسی بھی کارروائی سے گریز کرے اور پاکستان کی سالمیت کے سوال پر پوری قوم متفق ہے اور فوج کے ساتھ کھڑی ہے۔

یاد رہے کہ اپوزیشن کی جماعتوں کو حکومت سے شکوہ رہا ہے کہ ماضی میں ڈرون حملے روکنے سمیت مختلف معاملات پر وہ پارلیمان کی متفقہ قراردادیں منظور کرانے کے باوجود بھی ان پر عمل نہیں کرسکی۔

بعض تجزیہ کاروں کے مطابق مختلف الخیال سیاسی و مذہبی جماعتوں اور گروہوں کے سرکردہ رہنماؤں کا ایک جگہ اکٹھا ہوجانا بذات خود بہت بڑی بات ہے۔

لیکن اصل بات تو یہ ہوگی کہ اس فورم سے متفقہ پیغام کیا آتا ہے کیونکہ اگر ایسا نہیں ہوا تو یہ کانفرنس محض ایک فوٹو سیشن ہوگی۔